Coffee with a Cop （相簿）2022-08-31
首先多謝Brian Wong 黃慧聰 （左脚）- Asia Advisory Board共同主席為香港人安排今次Coffee with a Cop 活動，等香港人可以為我地生活嘅社區表達我地嘅意見及了解本地文化。
嚟咗8月31號嘅Coffee with a Cop 活動，相信都令大家知道咩係專業警察。除此之外，原來有啲嘢真係唔講唔問，係唔知㗎喎。
呢次由Calgary Police Service Asia Advisory Board主辦嘅活動，大約有22個主要嚟自香港同菲律賓嘅市民參與。活動先由兩個 Officer 帶參與市民入會議室同自我介紹，同時會議室嘅枱面已經放有咖啡同冬甩畀大家慢慢享用。嘅然係Coffee with a Cop，大家當然都拎住杯咖啡，然後自我介紹同舉手問問題。
例如大家可能一諗起報警，梗係911啦……X ……唔啱呀～！
- 其實Officer話，911係緊急情況先用，例如有人傷亡， 發現有人入屋， 搶劫之類情況。但如果冇人受傷或者唔係一啲可疑嘅case，就應該打 (403) 266-1234，如果亂打911，要罰款2000蚊㗎～！
其實RCMP同 Police Officer有乜分別呢？
- RCMP 皇家加拿大騎警 (Royal Canadian Mounted Police）係加拿大嘅聯邦警察，喺加拿大各地負責執行聯邦法規，但通常夠警力嘅大城市，好似Calgary, Edmonton, Red Deer 咁，就會有自己嘅Police Officer。
有朋友可能擔心，咁我英文唔叻，點打去報警？
- 其實作為一個移民國家，母語唔係英文嘅市民真係唔少。而且報案人報警時一定好心急同緊急。喺呢個情況下之，報案者可以用母語表達詳細情況，報案時又可講你想講邊種語言， Call Centre會有人員安排。
咁點樣做到Police Officer？
- 嘅然係專業警察最緊要梗係 Keep Clean 啦，即係唔可以有任何犯罪紀錄同行為；既然係專業，當然要抵受到壓力，始終有啲人會針對警察，出言辱罵㗎嘛；因為要接觸市民，所以都要有良好嘅EQ同溝通能力……好似好簡單正常，但又唔係度度嘅執法者都係咁專業喎～！
如果你或者朋友同仔女有興趣，只要有Class 5 Driver’s license，就可以上網搵下有關入職嘅要求，體驗吓一個受市民敬重嘅專業警察係咩生活。除咗可以服務社會外，重可以增加多啲同人接觸同溝通嘅經驗。Officer仲建議一個有興趣嘅Grade 12參加者，可以搵學校嘅School Officer去傾，School Officer 會好樂意解答呢個問題。
如果體格唔夠強壯，會唔會有文職位？
- Calgary Police Office 係隸屬City of Calgary，大家可以喺City of Calgary 嘅網站搜尋職位，入面有唔同嘅文職招募同相關要求。
如果面對罪犯可以行使咩權利？
- 當遇上犯罪時，要先保障自身安全，盡量避免同犯人進行正面嘅衝突或者搏鬥。因為過程可能會令自己受傷，始於人命比財產更為重要。
我哋事後問左幾位參與者嘅感想：
參與者A嘅感想：
今次活動真係得到好多資訊，喺香港係唔會有咁嘅機會，可以歎住咖啡同Officer以傾計形式了解警察嘅工作。 作為新移民可能對各項生活上嘅資訊都唔多了解， 尤其嚟到Calgary喺街度連Police Officer都好少見嘅情況下，不免產生好大疑問，究竟Calgary 係咪治安好到唔需要有警察巡邏？ 今次呢個聚會大家以普通市民嘅身份去親手揭開佢地嘅面紗，例如人手安排，911嘅用途等…… 呢啲都係非常實用嘅嘢。而且今次為我哋講解嘅officer唔係好嚴肅嗰啲，而係好風趣同有耐性咁從零開始同我哋解釋。希望下次有類似活動可以了解更多其他政府部門嘅日常工作。
始終我哋都叫做初到貴境，真係有好多嘢要學同想知道。我哋可能習慣咗東方人嗰種刻苦耐勞嘅服從心態，好多事唔問唔去了解只係跟order 做到最好，最後好似得到錢同一切，但係原來失去咗小朋友嘅未來同更多……既然可以喺呢個自由國度下從新生活，我哋何不投入多啲社會？一齊參與多啲社會或社區服務，當大家了解同習慣咗呢度嘅生活模式後，就可以畀多啲意見同提意畀政府去改善民生，為我哋嘅下一代同社會鋪一條更完善嘅路，呢個亦都係本會館嘅願景。
參與者B嘅感想：
我哋剛剛到埗Calgary， 能夠有機會去認識本地警察嘅服務，實在係好一個寶貴嘅經驗。
透過Coffee with Cop 呢個活動，並非飲杯咖啡咁簡單，反而令我哋認識到警察嘅日常運作；作為居民點樣圦分同運用緊急服務，究竟本地警察點樣處理案件？有關機構又點樣協助唔同方言嘅市民。所有資訊都令我哋更加認識呢個新環境，增加更多歸屬感添。
期待好快可以再參與呢啲，可以認識新環境嘅活動。
參與者C嘅感想：
喺參觀咗警局後，我明白到警察嘅部署方式同打911嘅規則。當然，我都明白警察對城市嘅治安同市民嘅重要性。
我心裏好期侍再次參與有關了解警察嘅活動，謝謝。
參與者D嘅感想：
今日去咗卡加利警察總部參觀，我覺得呢個地方好大同設備好完善，見到每個警察都好精神好友善。喺答問大會裏邊我哋認識到，原來緊急情況嘅時候先打911，喺冇人命傷亡同埋重大財產損失嘅時候，我哋要打(403)266 1234。而最重要嘅係，原來佢哋有多種語言選擇，可以畀到我哋一啲英文唔流利嘅人都可以報告到即時嘅情況。作為新移民嘅我覺得，呢個係一個尊重同埋令到我哋安心。
最後雖然只係短短嘅答問大會，但係都感受到卡加利嘅警方，好願意將佢哋嘅服務好詳細咁解釋俾我哋聽。離開嘅時候我仲有好多問題未能夠及時發問，期待仲有下一次同類型嘅活動，可以多啲了解加拿大警察嘅工作。
香港人其實唔係自私同冷漠嘅，只係低調嘅熱情同大愛啫.
香港人，大家加油！