2019年前從未諗過移民，就算有啲啲殘念都衹係一閃而過，邊有可能？父母年老，爲人仔女最大孝順，我諗係令佢哋老有所依，盡孝身邊，何況係父母眼中，香港係佢哋拼搏，奮鬥之地，一生心血，成就，得失，都在此，安身立命，置業興家，養兒育女，世上沒有任何城市比得上香港，如果2019年前你同佢講你要移民，佢應該係會贈你On9二字。香港地就算幾細幾悶，住屋迫，百物騰貴，大家仍然願意繼續落去，本以爲應該這就是人生吧，閑時飲茶，朋友偶爾相聚，痴住熟悉又溫暖的家，同老公吵吵鬧鬧，一齊老去。2019年，顛覆咗認知常理，連搵食大過天的老人家都頂不住了，當年佢哋搏命逃來此地，改寫咗命運，開創一片天地，終是諗不到，未過三代，仔女又要面對這水深火熱境地。所以今次同老人家提及移民一事，老人家即刻表示支持，盡管得知兩老之後嗰幾晚，夜不能寐 暗自傷神，但揀咗嘅路還是要繼續行落去，人難免是自私，偏心下一代，父母總是最寬厚那一位，目送仔女漸行漸遠。
呢一批移民，我諗相對早期移民輕鬆不少，資訊發達，物資豐富，無痛遷移~移民之前，我哋一家衹去過東岸，多倫多，當年嘅旅行經曆令我哋對加拿大産生好感，所以就算有BNO政策，我哋都堅持來加拿大。選擇Calgary 係因爲當時冇new path, 諗住來細省行讀書移民，再做打算。(去唔到多倫多所以來哩度，聽講Calgary 好靚，理由就是如此簡單)。籌備離港期間，開始研究Calgary 呢個地方，入咗香港人group，得到三位男神嘅無私幫助，講真，一開始好唔習慣，佢哋有問必答，真系好瑣碎的事都耐心講解， 喐啲就話要打過來同你傾，以我所知大部份港人都幾現實幾功利， 邊有人得閑放咁多時間同你講，而且新移民問來問去都係重覆又重覆嘅問題，佢哋要一次次解答，咁好心機？會唔會有咩利益？唔止冇，有時佢哋幫手買嘢，仲要蝕埋油錢 ，啲人一有麻煩嘢就打畀佢哋。。。衹可以話一方水土一方人吧，更加印證咗加拿大港人嘅友善，佢哋住得耐，同化咗，我哋係香港求生存多過生活，真系樣樣計住提防,小心又小心，對人哋嘅善意，真係受寵若驚。多得佢哋，未去到已覺得有信心，樣樣嘢有了解有準備，移民冇咁多恐懼。佢哋已移民多年，本不必去參與此事，却又花咗好多時間去集合資料，幫助其他人，我一直記咗係心，非常感謝！
我承認我移民唔係純粹爲小朋友，因爲社會氣氛自己都頂唔到，仲有住屋問題，教育問題，所以當決定移民，我係十分期待，我天性喜歡新事物 ，嗰種一成不變，日復一日嘅人生我可以堅持，但諗下都幾冇趣，加上我又虛榮又貪心，想住大屋想有大廚房長木餐枱，仲想有落地玻璃窗，望住一片樹林，呢個願望俗啲但幷不可耻吧，所以來到Calgary我將佢一一實現。
我個小朋友係香港讀私校，Happy School，少功課，活動教學，講真，學校幾好，又適合佢， 離開香港唯一唔捨得呢間學校，我知佢會讀得好，但我更加知道，佢將面對的未來，比我哋呢一代更加艱辛，佢嘅努力亦換不來對等的生活。所以有失必有得，不如我哋做個體面嘅，快樂嘅，有尊嚴嘅加拿大人亦不錯。佢依家番學適應又開心，好快已話自己唔想番香港了。我諗最唔想番香港嗰個一一一係我吧。
Calgary 係十分宜居嘅城市，感覺住落來就唔想離開，呢度嘅人都十分友善，接納外來人，亦唔覺有任何歧視問題，醫療亦十分快捷方便，(我已經有幾次就醫體驗)，我依家嘅家庭醫生係香港人，屋企附近有walk in clinic 前幾日啱試過又幾快哦，唔使點排，小病小痛直接去仲快，我細仔係呢度醫院出世，醫生護人士都超好，好照顧，噓寒問暖，唔誇張，我以爲自己住咁養和，我依家揸咁工簽，生仔無任何收費嘅。飲食方面，華人餐廳都多，華人超市又多，但比較少出去食，因爲中菜鍾意自己屋企煮，偶爾會出去食，主要食越南菜，韓國菜，日本拉麵。。。呢邊嘅餐廳多數質素好，所以飲食方面我唔會點掛住香港。
亞省港人谷對我幾有用，生活資訊分享，谷友傾下解，解答問題，吹下水講下笑，我唔覺同香港嘅日常有咩分別，(除咗冇海魚食，冇譚仔食)，我本身比較”自閉”，(人到中年啱傾嘅人真系唔太多，亦不需太多)，且唔喜歡太多人，太多交際，十分需要私人空間，更加需要多貼近大自然，呢度隨意一個公園仔，都靚，行一行，平靜舒服。生咗小朋友後，係香港，更加覺得放假冇咩地方玩，(長洲長洲長洲)，平日，小朋友可以係公園從放學玩到天黑食飯，來Calgary 後生活空間大咗，特別夏秋兩季，靚到不得了，好感恩來咗呢度，生活煥然一新，美好家居生活同零距大自然，原來我鍾意呢啲，唔試真系唔知。
講咗咁多美好，回歸現實，搵工問題。啲人成日話溫多大城市先好搵工，我感覺有小小誤區，中年新移民一般搵到min pay多小小嘅工作，其實呢啲工係邊個省都可以搵到，Calgary唔難，如果你呢邊讀過書就更加易搵。(以上爲身邊谷友搵工情況總結) 。
仲有小小建議，遠到他鄉，香港人要摒棄自身精明計算的一面， 偶爾奄尖刻薄嘅特色，少啲是非，我希望大家都與人爲善，口不出惡言，珍惜呢啲谷，珍視他人的善意。
最後，希望大家能得償所願，去到自己鍾意嘅地方，安居樂業。
「移民故事」純為投稿者真實個案同個人感興分享，與本會館及讀者立場無關。
