一家四口學簽嚟讀書(1)
- 編號： 移民故事 – 一家四口嚟讀書
- 截止日期： 已截止報名
- 名額： 有空缺
-
收費：
- CA$0.00
沒有項目！
眨吓眼嚟咗卡加利已經大半年，生活已經開始習慣。呢度生活較香港簡單一啲，我哋有小朋友，每天接送小朋友返學放學，自己就返工同返學。雖然同香港一樣咁忙但係呢度感覺舒服啲，冇香港嗰種成日都好趕時間嘅感覺。
我記得上年我係夏天過嚟，天氣好好，陽光普照，成日都有戶外活動接觸大自然，覺得好舒服，小朋友亦都好開心，所以我哋都好期待夏天嘅來臨。
喺呢度嘅生活同香港生活嘅分別係喺香港你可以請工人姐姐，可以搵屋企人幫手睇住小朋友，但係喺卡加利呢邊就要自己安排照顧小朋友啦，但係喺小朋友角度，佢哋讀書壓力細咗好多。我記得過去幾年喺香港嘅時候，小朋友每天返屋企都要做功課，每星期都有默書，家長一放工返屋企就要同佢地做功課溫書，唔單止佢有壓力，連家長都有壓力。但係喺呢度佢哋返學都係好開心嘅，冇咩功課，學一啲唔係書本上嘅知識，似乎呢種探索對小朋友既學習會好好多。
我嚟咗之後識咗一啲朋友都係香港過嚟嘅，似乎佢哋都好適應呢度嘅生活。有時我覺得適唔適應好在乎你來之前對呢個地方嘅期望。相比香港，喺卡加利嘅生活會簡單一點，有啲人會覺得卡加利比溫哥華、多倫多會悶一啲。咁就好在乎你想過點樣嘅生活。其實呢度生活都應有盡有，市中心亦很繁忙，咁當然離開市中心嘅地區會較為靜一點啦。但有啲人就係鍾意呢種嘅寧靜，唔似得香港咁度度都咁多人，由於呢度人少啲，夜晚燈都少啲，天上面嘅星星同月亮都特別光。我住嗰一區好多小動物，有時見到啲白兔跑來跑去，好得意，小朋友都好開心。
我哋黎之前聽講卡加利冬天會好凍，但其實嚟到呢度生活左之後發現其實屋企裏面有暖氣，冬天一出門口就上車，再加上每隔一段短時間仲會有暖流，所以問題都不太大。
我知道黎緊都會再有香港家庭黎卡加利，我希望大家香港人，組成一個群體，定期有聚會，互相認識，有困難果陣可以互相幫助。
「移民故事」純為投稿者真實個案同個人感興分享，與本會館及讀者立場無關。