其實回流加拿大嘅計劃，早在2019年初已經開始籌備。本身我同太太已經係加拿大公民，有過來人經驗，出發點都係想小朋友長遠喺加拿大成長同工作。決定了最好嘅時機係大仔2020年夏天完成小三課程後返加拿大生活。當時剛剛通過國安法，之前同之後所發生嘅事，都肯定左我哋嘅決定係正確。因為有充足時間準備，所以回流過程尚算順利。最難面對嘅，係要留低年老又唔願離開香港嘅父母......
來到加拿大，最開心嘅當然係小朋友。返學嘅日子，少了以往不斷重複嘅默書同測驗，換來更多時間去發展新嘅興趣和跟鄰居玩耍。作為父母，我亦都覺得自己少咗以前生活上總總壓力。雖然財政上暫時冇壓力，但自己明白退休實在太早，所以決定讀一個同工作有關嘅文憑，之後亦好好彩很快就搵到以前果行嘅工。雖然人工一定夠唔及香港嘅水平，但係我亦都珍惜呢個學習同埋適應加拿大嘅工作機會。
呢個世界冇一個城市係完美。溫哥華氣候宜人，風光如畫，但係樓價令人卻步。卡加利有寒冷嘅時候，但亦有好多獨特嘅優勢，比如接近落磯山脈，樓價相宜，可以讓小朋友在一個比較樸素同埋接近Canadian嘅地方成長。
曾經問過自己：每一代香港人都要移民，究竟係咪我哋嘅宿命？無論如何，香港人去到任何地方都可以生存甚至成功，因為我哋醒目，有效率，適應能力強。但最緊要係，唔好成日望住倒後鏡，諗返起以前嘅自己。隨着越來越多香港人落腳Calgary，希望我哋都可以努力去融入投入加拿大嘅生活，做一個好榜樣比自己下一代睇。我常提醒自己，要努力活好每一天，才不會辜負所有親朋好友對我臨走時嘅祝福。
「移民故事」純為投稿者真實個案同個人感興分享，與本會館及讀者立場無關。
