香港 - 我曾經覺得係一個可以安居樂業，應有盡有嘅地方。雖然無咩天然資源，但係物流業暢旺，稅又低.而且治安好好，交通方便，無論响咩時間地點都唔使擔心返唔到屋企。呢個世界你想要嘅嘢，只要有錢你就可以响香港擁有。香港人嘅工作效率同認真程度，真係令住响香港嘅人有一個非常好嘅生活方式，就算住嘅地方唔大，都唔會想離開。
可惜呢幾年香港嘅變化，對將來嘅憂慮，身邊嘅人嘅離開，都令我覺得係時候諗下呢個仲係咪我一直要生活落去嘅地方？加上各國政府推出唔同嘅計劃俾香港人一個選擇嘅機會，咁我就諗，人生只係過咗一半，呢個世界咁大，係咪一世人都要過啲咁高壓嘅生活？（利申：我係做成衣出口貿易，新疆棉事件對呢個行業影響好大，加上呢一行都係做季節性產品，所以OT係一定要，24小時on call亦係必需，因為個客响北美，隨時要開會。）就响睇唔清行業前景嘅情況下，我覺得俾幾年時間自己出國體驗下，讀下呢個社會大學，或者係一條出路。雖然無人知道呢條路對自己係好定壞，但係人生就係咁，無嘢係必然，只要過程中盡咗力，好好享受就夠啦！
過嚟之前，其實一路都好期待，因為好想快啲離開一個壓力好大嘅壓力煲。嗰時完全無諗過過到嚟會點？自己想做啲咩？會唔會唔適應等等嘅實際問題。感覺就好似去旅行咁，未出先興奮！一直到上飛機前嘅一晚，開始唔捨得呢個我成長嘅地方嘅人，景物同食物，經過送機嘅過程之後，我成程飛機差唔多由上機喊到落機，好掛住呢啲陪住我長大嘅人同事，好想原機返香港，因為我真係好唔捨得。
靜一靜之後，就覺得點都試下先，真係唔適應，我都可以有退路，唔應該俾嗰種情緒影響人生一個咁大嘅決定。啱啱開始嘅時候，我响安頓生活細節嘅同時，很快就開始搵工，因為要知道自己係咪可以响呢個地方生活，一份穩定嘅工作係好重要㗎！
由於自己唔係專業人士，又無咩特別技能，開始嘅時候，真係咩工都試下掉Resume去搏機會，社工、銀行、售貨、待應，當然亦都有成衣行業。因為心態上只係儲夠時數申請PR，所以做咩工真係無咩所謂，所以好快已經搵到工。坦白講，呢度搵工唔係好難，只係自己係咪可以接受唔同嘅工種，低一截嘅人工同埋低人工仲要交「重稅」。如果你有返咁上下年紀，現實係呢度搵錢真係少過香港，因為以一定嘅年資對比加拿大新鮮人，真係同啱啱畢業嘅人工差唔多。如果有呢啲心理準備又接受到，其實呢度真係好舒服（我仲未經歷冬天），空氣好，人少啲，壓力無咁大，生活簡單啲，人與人之間嗰種比較都少啲。
返咗工，開始融入呢度呢個社會，會覺得呢度啲人真係好nice，响香港做啱嘢，OT係老奉，唔會有人欣賞，做錯嘢俾人串，俾人mean係正常。呢度嘅工作日常真係顛覆咗我對工作嘅諗法，做得快會俾人讚，啲嘢做唔晒，夠鐘上司都會叫你走，然後幫你排 Priority。响香港樣樣都 Top Urgent 嘅環境比較之下，呢個真係一個工作天堂。不過，由於自己英文唔係特別好，亦唔熟悉本地文化，要明白 / 融入佢地嘅話題都唔係一時三刻可以做到嘅事。相信呢啲都係用時間同努力可以改善嘅嘢，响一個新環境生活，真係要有呢啲心理準備。
中秋節就快到，今年無得同屋企人同朋友一齊過，個心係唔係咁開心。但係世事無絕對，可能出年佢哋都會過嚟同我一齊過呢！而家買張機票就可以團圓，其實又唔係真係好難，加上 Facetime 都可以日日見到，有時將一個時間軸拉長嚟睇，可能呢個先係應該要行嘅路呢？另外，呢度中秋節都會慶祝活動，出去唐人街睇燈籠，去朋友屋企 gathering， 就算離開香港都一樣可以過節食月餅。其實卡加里嘅生活模式同香港真係好唔一樣，無得直接比較，不過隨住愈嚟愈多香港人過嚟呢個地方，我相信有一啲香港嘅生活模式，係會慢慢滲入我哋嘅生活之中。而隨住香港人嘅努力，希望大家會有另一個可以安居樂業嘅地方。共勉之。
「移民故事」純為投稿者真實個案同個人感興分享，與本會館及讀者立場無關。
