消失14個鐘嘅約定
- 編號：
- 截止日期： 已截止報名
- 名額： 有空缺
-
收費：
- CA$0.00
沒有項目！
大家好,我同我未婚妻都係係香港土生土長嘅90s後，所有家人，大部分朋友都係香港。由於近年香港發生好多社會問題，亦都蔓延至全港嘅學校 – 由2008年開始普教中，到近年嘅國安法教育。睇住香港由一個多元發展空間，自由嘅國際金融中心，到依家每況愈下，今非昔比，令我地不禁為下一代擔心。擔心佢地番學俾人洗腦，擔心佢地將來嘅成長環境。基於我地都想生小朋友，但唔想佢地係香港成長，所以我地決定 「 移民」 。
初時得英國開放BNO 5+1 plan嘅時候，我地第一時間做資料搜集，同時都等緊其他國家嘅新一步安排。一開始同好多人一樣冇諗過會咁早就走，原本諗住係香港做多幾年嘢，結埋婚，生埋小朋友先走都未遲，橫掂又冇限期。直到加拿大提出香港人救生艇計劃，我地即刻叮一聲!機會嚟啦，再諗諗遲下先走就永遠真係得個諗字，唔會走架啦。
講講我地嘅背景先啦。我同我未婚妻都係剛剛出社會工作幾年，都係外資銀行，最近亦都獲得升職加人工嘅機會，可以話係事業嘅起步時期，最好嘅發展機會。我地雖然唔算係中產，但近年有計劃結婚生 小朋友(未婚妻話想要孖女/仔)，所以換了兩房單位。係香港生存絕對唔係問題，睇你想下一代係生存定生活…一想到未來5年，10年，15年…就決定要果斷離開，離開生活咗二十幾年嘅地方、家人、朋友…去到相另時差14小時嘅地方。哩個決定好難，但一定要做!
由決定走到實行其實只係一星期左右。我地最後決定係我過嚟讀書，探索下哩邊嘅環境先，然後佢出年或者到我讀完拎埋PR先過嚟。睇到哩道，我諗你地都會同我所有朋友問同一個問題…「分開兩年 long D wo，捱得到咩?”」 無錯，哩個係一個好實在，好難答嘅問題…但我想同大家講，只要肯踏出第一步，肯去改變，大家目標一致，就冇難到我地!到時係加拿大見到我地不防同我地say個hi, 識多個朋友，正所謂遠親不及近鄰，大家互相幫助先係香港人精神架ma。
我地2021年10月決定要去加拿大，然後即刻報考IELTS，揀科報學校，一切都好順利，2022年1月就收到學校取錄通知!!! 跟住就緊係即刻申請Study Permit 啦。申請之前聽人講好難申請，又要寫Letter of explanation去證明例讀原因，都有少少不安。不過好順利，DIY 一take過，3月左右就收到SP啦!!!!!
過到嚟Calgary剛剛好一個月，剛剛開始轉凍。好多人話難適應時差，難適應外國生活文化，唔習慣外國嘅飲食。對我嚟講所有嘢都好易去適應，好快就習慣到。坊間有一樣嘢講得無錯嘅，就係哩邊真係冇香港咁多娛樂，咁易遊山玩水，冇自己私家車就真係好少地方去得到…(利申:筆試一take pass，準備考路試)。所以，走之前諗一諗你為乜走，想係外國得到乜嘢，唔好人走你又走…哩個決定講就易 要實行係難!
希望我個故事幫到15 16嘅你! 係Calgary嘅朋友祝你地順順利利，為各自目標加油 共勉之 !!