大家好！
我去年九月開始讀Nait. 喺香港Online左兩個月，喺11月尾一家四口飛去Edmonton投靠親戚，過咗兩個月，老公話都係鍾意Calgary多啲，所以今年係初一嘅時候我哋搬咗去Calgary。
其實我都非常好彩，申請學校，到申請SP，都一take過，冇太大阻滯，到加拿大嘅時候又唔使隔離。我喺Nait 讀BA，我自己大學都係BA，和 MBA, 名副其實倒讀，所以我個人認為：倒讀唔緊要，最緊要SP認認真真咁樣解釋！其實當初有諗過讀 day care，但係呢啲年紀唔想再讀啲新嘢，唯有博一舖！好彩，過到骨！畢咗業先算啦！
因為要讀書又要照顧兩個小朋友，所以我每個學期讀3科，係最Basic嘅要求！如果一個sem讀五科，最快係可以年半搞掂！我親戚就係年半讀完，幾個月後仲出埋PR！爽！大家加油！
至於我個仔， 10歲讀Grade 6, 佢同我講，學校啲同學仔好好，啱啱返學嘅時候，特登講嘢會慢啲，同埋會用啲簡單啲嘅字同佢一齊上堂討論！
我細女，4歲，讀緊preschool , 返星期一，三，五，每次兩個半鐘，大約$200加紙！返去都係玩。
我先生，喺加拿大讀咗一個三個月嘅data science課程（其實佢本身香港都做緊相關項目）跟住都搵咗幾個月（五月send CV ; 七月八月面試及 background check )希望之後一切順利。
至於交通，我哋都未有車牌，冇車的確係冇咁方便，但未至於生活唔到，所以未嚟加拿大並冇車牌嘅朋友，唔使擔心！
關於天氣，冬天係凍嘅，但又未至於到凍到行唔到出街，負20幾度，我哋都係大大細細咁一齊行返學！試過有一次負幾度，我冇帶手套去咗 Walmart （因為和負20幾度比，以為暖咗，但原來拎隻手出嚟拎嘢都係好凍㗎！）跟住我搵膠袋笠住隻手，哈哈........
最後，多謝卡加里香港會館義工嘅付出，你哋嘅幫助對我哋新移民嚟講，真係好有用！
「移民故事」純為投稿者真實個案同個人感興分享，與本會館及讀者立場無關。
