執筆之時剛到Calgary 兩個多月。回望由掙扎應否離開香港，說服自己，同家人商量，動手申請加拿大的救生艇stream B計劃，到現在在Calgary 稍為安定下來，心內好像已經經歷了幾波大衝擊。只是一路鼓勵支撐下來，未敢正面去接觸內心脆弱的感覺而已。
我哋由細到大都被環境訓練到做人做事要快手，無錯誤；但係試問在移民這個幾乎是人生之中最重大的一個決定時，又有誰可以給我一個絕對正確的答案？這時候大概要依賴自己內心的價值 - 什麼對我來講是最重要: 1. 免於恐懼的自由；2. 有味道生活，不只是生存(我唔驚辛苦，只係驚冇希望）。咁，移民來到這片土地，大概不會錯。剩返低的，是如何適應和調整所需的時間而已。
這兩個月，我學會要調整的是心態。可以繼續選擇好似係香港生活咁-快狠準，但係會好辛苦。因為不是在香港，那套功夫係呢度打唔到。打到的，只有我自己。簡單來講，冇得急，畀耐性慢慢做，但係堅持事情要清清楚楚。得同唔得，大部分都會有答案，又係時間而已。
第二，團結呢樣野實在太重要。2019年，二百萬人，已經證明了香港人本質係可以的，係做到的。只是以前營營役役為口奔馳而未見到。一到大敵當前，我哋自己和整個世界都見識到。而家落到去每日的真實生活，作用大哉，大至買樓買車搵學校，細至日常生活grocery，在亞省谷 - Calgary，我完全感受到大家的團結，感動。
在適應新生活之餘，其實我發覺Calgary勁多野玩。運動包括Hiking, camping, rafting, skiing, golfing, ping pong badminton, dancing…; 因為我做心理輔導，所以又有機接觸到好多多元化的治療方法，直接同一D久仰大名的大師學習。係呢方面，我覺得事業上的機會反而比香港較多，起碼可以發揮的方向冇咁單一。因為呢度較普遍地接受以人為本嘅治療方法，啱我style。
生活上當然有不如意的事，例如買車時，經歷過一些不良的銷售手法好谷氣，註冊心理治療牌照時需時漫長不能一鞠而就，搵工冇乜回音之類。幸運的是有一班新相識谷友照顧提點，相信未來的生活很快又會move到新的一個階段。我諗，做人都係免不了經歷大大小小的苦難，只不過係我哋有時選擇唔去睇佢，以至唔多覺咁解。但係如果選擇不逃避而嘗試去克服，咁，又會提升到下一個層次，更接近我哋自己；你點睇？
「移民故事」純為投稿者真實個案同個人感興分享，與本會館及讀者立場無關。
