有時覺得好有趣，有啲人想講一百次一千次大話，去改變一件發生咗嘅事。好似好荒謬，但事實上有啲人，真係就係咁樣被洗腦，就係咁樣教下一代一啲假嘅嘢。
我諗大家都明白歷史係一啲已發生咗嘅實事，加以紀錄以作參考。而歷史最大價值係借古鑑今，所以點可以接受到歷史被竄改？有啲人以為竄改歷史就可以幫自己洗白，但其實每個人都睇得到望得見。
或者大家可能知道，卡加里有一條以香港命名嘅街，究竟同香港有乜關係？原來加拿大同香港都好有淵緣㗎喎。
Hong Kong Road，其實係紀念加拿大軍參與過嘅其中一場戰役，而呢場戰役亦都改變咗香港好多。你睇，何止有而家嘅救生艇，原來之前已經⋯⋯
香港保衞戰（Battle of Hong Kong） ，係喺第二次世界大戰，大日本帝國發動太平洋戰爭嘅第一日，日軍入侵英屬香港嘅一場仗。
戰役喺1941年12月8號清晨開始，亦即係日軍偷襲珍珠港後大概6個鐘；12月10號日軍攻破醉酒灣防線；12月13號佔領九龍半島；12月18號夜晚成功登陸香港島。香港守軍（駐港英軍、香港義勇防衛軍、香港華人軍團、加拿大陸軍）展開頑抗，攻守兩軍喺黃泥涌峽、淺水灣同赤柱等地爆發激戰。因為香港守軍作戰失利而且孤軍無援，當時身兼香港三軍總司令嘅港督楊慕琦喺12月25號下晝決定投降。因為正值聖誕節，所以又有人話係「黑色聖誕」。
香港日佔時期歷時「三年零八個月」，至1945年8月30號英國皇家海軍艦隊入維多利亞港，佔港日軍向英軍投降，香港重光，再由英國恢復治管。
歷史要留存、流傳，唔可以被消失或者竄改。越要滅聲越要竄改，我哋就要更廣泛流傳。發生過嘅事，係唔可以消失嘅。多謝香港守軍嘅努力，邊個政府為香港好，係有目共睹嘅。
而因為戰亂而令到生靈塗炭，我諗無論咩政見，稍有良知嘅都會覺得可惜。
咁大家又知唔知十一月十一號係一個關於戰爭又好有意義嘅日子？
呢個咁有意義嘅日子係喺1919年英聯邦發起嘅「停戰日」，主要紀念結束第一次世界大戰。之後為紀念第一次世界大戰同第二次世界大戰以至其他戰役犧牲嘅軍人同平民，加拿大亦都將呢一日定為加拿大國殤紀念日 （Remembrance Day ）。
每年，卡加里政府都會喺呢日安排紀念活動，去感謝為戰役犧牲嘅軍人同家屬，感謝佢哋為和平而無私付出。喺2016年嘅紀念活動中，更有香港留學生以「前香港市民」嘅名義參加獻花圈儀式添。活動之後，本地制作團隊井作仲搵到退伍軍人Ralph MacLean做咗個訪問，仲拍成紀錄短片添 。
而國殤紀念日仲有樣嘢好特別，就係有啲本地人會戴紅色虞美人花（Poppy）。普遍講法，戴紅色虞美人花係出自一個加拿大軍醫John McCrae嘅一首詩《在法蘭德斯戰場》（In Flanders Fields)，因為喺第一次世界大戰打得最慘烈嘅一扙，就係喺開滿虞美人花嘅法蘭德斯，而紅色虞美人花亦都代表嗰場扙打到血流成河一樣。
如果大家喺超市、商場見到有個Legion捐款箱，旁邊有一啲紅色花仔，你可以捐小小錢然後攞粒花仔戴上，好似買旗咁。咁Legion就會用呢啲捐款去幫一啲退伍軍人同家屬。
用暴力去侵佔同控制，已經係一個好唔文明嘅做法。希望有一日再冇打扙；全世界領䄂再冇侵佔嘅心；所有人類安安樂樂，唔駛再「活在恐懼下」咁就好喇！同埋記得十一月十一係一個好有意義嘅日子，唔係某啲國度入面，為氹單身嘅人買嘢而設㗎！
*如果對「井作」有關加拿大退伍軍人嘅文章有興趣，可以去以下連結 :
https://wellmediacanada.wordpress.com/2020/04/05/remembering-ralph-maclean/
