沒有項目！
眨下眼黎咗Calgary已經3個月，由一開始黎到周圍都係雪，到而家四周圍開滿黃色小花，我地一家都開始適應呢度嘅生活喇。
家姐就唔駛講，返學冇功課，日日放學都有得同D同學仔喺公園玩，呢3個月去公園玩嘅次數，加埋仲多過喺香港幾年嘅時間。至於細佬，佢出世半歲左右就開始爆Covid，基本上冇咩機會去街同去旅行，就連屋企附近的公園都圍封到兇案現場咁，所以岩岩黎到Calgary喺公園玩，佢明顯係比本地比佢細嘅小朋友論盡，但經過呢幾個月嘅「訓練」，佢已經身手敏捷，香港嘅親戚朋友睇到兩個小朋友嘅相同片，都話佢地比喺香港時開朗同開心咗好多。對於父母黎講，可以見到小朋友開心活潑咁成長，真係比一切重要。
而我自己就走出咗自己嘅comfort zone，去讀一個我從未接觸過嘅範疇，一切對我黎講都好新鮮，所以我想更加努力，希望可以喺呢度搵到自己嘅第二跑道。 至於爸爸，佢喺香港嘅時候工作時間係好長，返10放10，如果計埋搭車(來回加埋兩個鐘)，每日可以同小朋友互動嘅時間可能只得朝早出門口前極短暫嘅十幾分鐘，因為夜晚佢返到黎兩個小朋友已經訓了。所以細佬係一D都唔痴爸爸，甚至有D驚佢。黎咗呢幾個月，俾機會佢地親子日對夜對，早兩日我問細佬，你最鍾意邊個呀? 佢答我：「最鍾意爸爸 ! 」而我眼尾見到爸爸係喺度嘴角微微向上翹咁甜笑雖然我係有D失落，但我都戥爸爸開心，我相信呢一刻佢到老咗都唔會忘記，因為呢D係用錢都買唔到嘅親子關係。
感恩黎到遇到嘅都係好人好事遇到好嘅同學、好嘅鄰居、好嘅朋友。
有幾個黎到先認識嘅本地人分別問我搬黎之前有黎過Calgary嗎? 我答冇呀，冇黎過，加拿大都係第一次嘅時候，佢地都不約而同咁話soooo crazy，但佢地講嘅並唔係負面嘅意思，而係想話佩服我地嗰份勇敢。但我想講嘅係，好多謝Ricky、Peterson同呢個group曾經分享過嘅所有人，係你地嘅無私分享，至令我地一家有勇氣踏足呢個陌生嘅地方去開展我地嘅新生活。