沒有項目！
其實我自細就想移民，當然一直都冇機會， 屋企人又唔贊成，所以呢個諗法都放低左好耐，直到 2017 年既三月。個年我同我太太，同埋兩個朋友，再夾左一個係背包客棧識既香港人（就叫佢做J）一齊去冰島，咁係旅程途中，我地就例牌傾下香港既政治環境，又傾下 2014 年後發展既事，咁Ｊ就同我講，不如移民去加拿大，而且我又做IT，唔難搵工既，收入仲會好過香港，自從呢一晚，我個想移民既念頭又走番出黎。
係冰島番香港之後，我同太太就不時搵下資料，留意下去加拿大邊度移民比較容易。咁經過一輪篩選，我地揀左係曼省既溫尼伯搞讀書移民，仲搵左個移民經紀去幫我地安排，由於當時並冇太多資訊俾我地做DIY，而且個陣既移民顧問收費仲係好平，所以我地就搵人幫我地搞。與此同時，公司升左我職，仲有機會去美國總部視察下，而老婆既新娘化妝事業都係上左軌道冇耐,不過我地都立下心腸，繼續行我地既移民路。
咁由七月開始，我就去考IELTS，報名申請學校；八月就收到學校既Conditional Offer（因為得６分， 唔夠學校入學要求既 6.5 分），做身體檢查同申請學簽；九月我既學簽就批左；十月我就同公司辭職，搞退稅同拎番堆強積金；十一月就訂埋當地既民宿同買機票；；就係十二月廿七號晚，我地終於到達溫尼伯機埸，落機個時既溫度係負38度。係香港諗都冇諗過咁多係點既滋味。我諗對於近排移民去曼省溫尼伯既人，我都算係先頭部隊啦。
咁一直到四月啦，英文班終於畢業，順利開始一年既專科，我讀既係Project Management Diploma；六月既時候，我太太就係境內申請SOWP；九月就收到我太太既工簽啦；18 年一月既時候，我太太經朋友搵到份係酒店做既全職工作，就係做執房，由於同佢以前做開既野好唔同，佢成日都會呻辛苦同埋喊，不過佢為左大家移民成功，都繼續捱落去，呢段時間真係辛苦左佢。
有人可能會覺得 hea讀就好易搞掂，又或者怕年紀大唔敢再讀書黎搞移民，其實真係好 chur，星期一至五每日都番 8 - 4，每日都上唔同科；不過亦有好多其他國家既人同自己一樣會讀書移民，而且都有五六十歲既人黎讀，最終係 2018 年五月，我終於畢業，同時開始搵工；六月既時候我搵到份工，亦都可以申請畢業工簽，但係太太已經做左份工半年，符合申請 MPNP 既資格，所以就交俾佢申請，不過佢英文水平唔得，初時都有少少擔心，但最後考左兩次 celpip 就搞掂啦，於是八月既時候，我地就遞交申請啦，而我地亦係2021年既三月拎到 PR，中間既 time line 可以睇番我地個 page，入面有份列表。
中間既過程我就唔係度詳述，有興趣知道既可以係我地個專頁搵到。接住落黎講下係呢邊既心態轉變，其實我地搬黎呢邊之前從來都冇去過加拿大，冇視察過個地方岩唔岩大家，只係考慮邊個地方可以最平，最快同最容易，真係一落決定之後就拎哂所有錢，冇回頭路咁搬黎加拿大，可幸既係我地適應左呢度既生活，冇後悔過當初選擇移民。一落機個下，見住機埸個溫度寫住負38度，真係幾興奮，話哂咁大個仔都冇試過去d咁既溫度既地方，雖然之前一直都好想去西伯利亞玩，但同要長住始終唔同既，個時係諗住長住，冇打算搬省。而且當時係溫尼伯係極少香港人既，只係有幾個係香港識左冇耐，咁岩又係之後會黎搞讀書移民既人聯絡下咁，誰不知經過2019事件，一個得寥寥可數香港人既地方，竟然會多到係我走之前可以周街聽到廣東話，自己居住既社區，10分鐘內就有過百戶香港人，自己亦識左一班岩傾岩玩既香港人朋友，呢個真係始料不及。同埋係呢邊搵工亦唔係當初人地講到咁難，又話冇本地經驗唔會請你，又話唔睇過往係香港既經驗云云，實際係只要你有心搵，唔怕等多幾個月， 你係可以搵到份岩心水既工既，我亦好彩地做得番自己個行。至於做個份工辛唔辛苦，我係覺得大家應該要以目標為本，拎到 PR 卡之後你想做乜都得啦，最緊要盡快搞到移民，我知宜家有救生艇計畫，但其他唔附合資格既人可以選擇讀書移民，有心想走就唔好拖，亦都唔好為左係香港搵錢就做太空人兩邊走，對自己對屋企人都冇好處。
** 歡迎大家Click 下面個 Youtube 同埋Instagram 俾個 Like 同埋 Share 去 Support 番響卡加里住嘅香港人 Blogger **
Youtube : Calgary Asylum 卡加利楓人院
Facebook : Calgary Asylum 卡加利楓人院
「移民故事」純為投稿者真實個案同個人感興分享，與本會館及讀者立場無關。