2022-08-07
我….本身只係一個平凡既香港人，或者而家時代可以講成係社畜，係香港只為生存。生於80年代，享受著香港經濟起飛所帶黎既成果，曾相信只要肯努力，就一定可以搵到自己既安落窩。然而，經歷了回歸、沙士後，香港開始走向下坡。不論係政治、社會或經濟好似慢慢倒退，特別經歷完2次社會運動後，已開始發現現時既「自由」只係一個口號，叫完就算，完全冇說服力。就好似Bandai係上海特登起一部1比1既「自由」高達咁，簡直係笑話一則。於是就開始有離開香港的諗法。
經歷過短暫既澳洲工作假期，令我見識世界既大不同，教識我生活同生存既分別。因此經歷2019年社會事件後就同老婆決定移民。起初，老婆唔想走，擔心適應會出現問題，例如言語，生活習慣，天氣等等…但當諗起下一代，即時覺得香港既教育制度已經傾向行內地那一套，所以老婆最終都決定離開。
當然離開都有好多考慮，包括目的地、資金去移民政策。當時老婆首選英國，因為多謝「偉大」既國安法令到英國出手，一時間好多人都出發到英國。而我本身就對英國冇咩好感，因此就決定加拿大行學簽。當然比起英國，加拿大呢條路絕對唔易行，但就係呢個時候，加拿大政府竟然推出香港人既救生艇，我即時覺得一切都係上天安排好晒，因為我出發去工作假期，令到我延遲左1年畢業，就咁啱符合資格。
於出發前在香港渡過最後一年的日子裡，我努力上網上英文班，搞文件及搜集資料。期間細囡都出世了，在最後既香港時光中，遺憾既係未能帶兩個囡去認識香港，因為係武肺既陰霾下，整個香港都好似世界末日咁，所以只好帶住遺憾出發到新地方-卡加利了。
我哋十分好彩，因有親戚的朋友接應，總算好快就叫安頓好。比較叫我驚訝既係，呢度所接觸既都係華人居多，不同文族亦有各自既社區，每個人都展露笑容，令人十分放鬆。
係呢短短3個月既生活內，令我同老婆感受到以前香港人既人情味，例如有朋友知我哋初到貴境未有汽車時會主動邀請我哋上車、有朋友甚至不停有工作機會比我，都令我哋十分感動。
生活-唔一定要追求高質素，只求舒服自在，黎到呢錢可能係搵少好多，但換黎既係冇比既快樂，我兩個囡囡十分鐘意呢度既生活，咁我哋做父母既辛苦少少都值得既。我將來都希望當我讀完書拎埋居留權後可以實現到置業呢個夢想。因為係卡加利，買樓唔係幻想或者妄想，而係實實在在可以靠打工儲錢所買到既生活必需品。同時亦希望將來有能力協助其他人解決生活上既不便。
離「家」係需要好大既勇氣，但只要踏出舒適區，世界其實好大，我相信真正既香港人都能夠係世界各位宣揚香港精神，而只要「人」係邊度，「家」就會係邊度。香港就由我哋既「家」變成我哋既「故鄉」。
「移民故事」純為投稿者真實個案同個人感興分享，與本會館及讀者立場無關。
