沒有項目！
大家好 我係Crystal ，係一個英文老師。喺2022年四月同老公一齊移民嚟到加拿大Calgary。
其實我哋喺2019年嘅時候就開始去計劃移民。一開始就係諗澳洲嘅，研究過之後，原來澳洲係啲分數已經拉到好高，比較難移民。機緣巧合之下發現原來加拿大係一個好歡迎移民嘅個國家，所以嗰陣時開始睇咗好多好多相關嘅資訊，同埋唔同嘅移民渠道 。跟住因為20年嘅疫情好多嘢都放慢曬，咁所以最終我哋喺2022年嘅4月先至正式落地。
我哋嘅故事其實我諗都同好多香港人一樣啦，本身喺19年之前都唔算對政治有好高嘅敏感度，喺雨傘嘅時候有去支持一下，但係完咗之後又好似回復返正常嘅生活……去到19年嘅時候先發現問題嘅嚴重性，同對環境感到失望、無助……本身諗住屋企人喺晒香港，就算環境差都冇諗移民，同埋覺得我哋兩個大人、冇小朋友，喺呢個環境都冇話生存唔到嘅。但係我父母竟然主動提出叫我地襯後生可以研究吓移民，嗰一下叫做開咗個綠燈，原來佢哋都唔介意，咁我哋就去著手準備啦。
咁一開始就當然係會睇Express Entry (EE)啦，當初就係抽緊47x分嘅，咁我計過數呢就46x分咁就好似差唔多喎，可以等下喎，咁就一路等喇。等咗幾個月之後就發現咁樣等法都唔知個分數會唔會跌，咁所以就的起心肝喺20年嘅5月左右呢就去開始學法文，想用呢個方法為自己嘅EE加多50分。努力咗半年嘅時間，終於喺2021年嘅1月TCF Canada攞到B2呢個成績!! 好開心!! 即刻慶祝可以加50分變咗51x分!!
諗住即刻中獎，每一日朝頭早七點幾起身呢就係去check下個電話有冇抽度，點知嗰時開始EE FSW一路停咗……
其實自己係17年有個Postgraduate Diploma畢業，但係都唔想行OWP 住想等下先，但係去到某一個位發現都唔知等到幾時，咁就去申請OWP.先過咗嚟加拿大做住嘢先再慢慢等。我本身如果我早多幾個月嚟就可以趕得切行Stream B，而家就趕唔切啦喇…..但係我哋覺得其實用住OWP先過嚟係比喺香港等係明智㗎! 因為我哋嚟到可以先儲住工作經驗先啦，然後可以再諗下行點樣去攞到PR~
呢個就係我哋移民嘅路喇~ 咁至於工作方面呢，好好彩我哋兩個都可以做返本行。喺香港我一畢業出嚟做嘢就已經教英文，本身對移民加拿大做返本行都冇乜抱太大嘅期望，咁既然疫情困住咗喺香港，咁不如就趁機去增值下自己啦! 咁所以我都好積極去讀唔同嘅課程，包括有獸醫助理、寵物美容、物理治療助理、寵物穴位按摩、整麵包等等……諗住周身刀冇張利㗎喇，但係at least我有一啲基本嘅認識，搵工嘅時候都講到兩嘴啦! 咁但係去到越近移民嘅日子，我都問下自己其實我喺香港嘅教學經驗同埋我嘅qualifications係唔係真係嚟到加拿大變廢紙呢? 冇理由係咁㗎嘛! 我唔相信呢啲嘅經驗係零，咁所以我就開始試下執一執自己個CV，睇下可唔可以搵到相關嘅工作或者試下水溫啦。
好好彩地我喺二月嘅時候就有兩個online interview嘅機會!最終就係而家呢一份工請咗我喇。喺interview過程入面佢哋比機會我去講下自己喺香港嘅經驗、點樣同加拿大有接到軌嘅等等。我亦都好誠實咁同佢哋講，我知道香港同加拿大有一定嘅分別，但我相信中間嘅相似之處都係好多嘅，我需要一啲時間去到catch up，但係我相信我嘅經驗係可以搭夠嘅!
咁而家都做咗四個月喇~我教嘅課程呢就係叫做LINC，專教新移民英文。其實係呢個課程入面除咗教英文之外，仲有好多關於settlement嘅嘢，包括係睇糧單啦、加拿大重要節日嘅背後嘅故事、加拿大唔同省份嘅首府等等。其實呢啲嘢一個普通嚟到嘅新移民可能都會心入面有啲question，但係未必會好主動去搵個答案出嚟，如果我自己唔係教呢一個program我都唔會特別research一啲嘅資訊……呢一個真係一個好好、好好嘅機會去比我去繼續做返自己嘅本行同認識加拿大嘅文化，好似一個雞精班咁。
咁至於我老公呢，佢本身喺香港係做地盤，主要係做電嗰方面嘅工作。過到嚟加拿大就因為要重新再考過牌先可以合法咁去做電嘅工作、而我哋呢係用工作簽證嚟唔可以讀書，所以佢落地嘅時候都係主要搵一啲裝修、工程有關嘅工作試下做先。佢而家做緊一間華人翻新公司，其實喺一間屋可以做到嘅翻新工程佢都接觸曬咁濟㗎喇， 包括屋頂、地板、basement、廚櫃、花園等等 。工作溝通上面，佢暫時都係圍繞住華人嘅生活圈子，暫時講英文嘅機會就唔多。但係佢好快學到好多關於呢一度嘅屋嘅資訊、點樣保養維修咁，都學到好多新嘢~
我哋兩個暫時因為一落地呢就已經開工咁濟，生活好充實，呢幾個月都好似蜜月期咁過得好舒服。我哋覺得4月係一個好好嘅時間呢去比我哋settle!如果係寒冬嚟呢，可能未必適應得咁快咁舒服~
可能有好多香港人嚟之前好似我哋咁有好多嘅疑問、好多不安，嚟到加拿大係唔係淨係可以做基層工作，自己個專業係無用武之處呢? 其實都唔需要諗得咁極端、咁灰嘅，咁當然有個過渡期，跟住去慢慢build up返個network。個人落到地去搵工一定比起坐喺香港空想多好多機會!
希望我哋嘅小故事可以比到香港人嘅一啲信心，嚟到加拿大係可以有人尊重我哋嘅專業同拼勁，唔需要擔心太多。尤其而家唔同嘅城市嘅香港人community已經越嚟越大、support network其實已經好好! 比多啲信心自己，離開你嘅comfort zone，就會發現其實呢個世界可以好大~