沒有項目！
有朋友問我：「喺2021年離開小島，你覺得係啱定錯？」
我二話不說：「我覺得係錯！」
由2019年頭，聽到言論自由開始受衝擊，心入面即刻好煩。19年中就同太太係咁意講講關於逃生門嘅可行性，當時就畀一個叫做「第二家園計劃」嘅概念吸引到。心諗，搵一個地方當成逃生門，小島有乜突發都好，保住條命仔就有重新生活嘅機會。始終，大概冇人想，人生嘅下一秒會變成沙堆下嘅數字人呱。
醒目嘅太太雖然搲晒頭，但仍然好畀心機咁，不斷為我去搵相關嘅資料。最後一場又一場嘅介紹會後，我哋突破咗一個大盲點：如果只係一個逃生門，咁嗰一刻逃咗生，但之後嘅生活呢？小朋友嘅讀書同前途呢？所以我哋就開始了咗重新設定我哋嘅「第二家園計劃」。而其中嘅三大原則係：要生活自在有質素、小朋友讀書要開心、我哋工作之餘可以陪多啲小朋友。而喺機緣下開始研究移居加拿大嘅可行性。
經過一連串嘅 research ，喺網絡上識咗喺加拿大生活嘅華人。當我哋兩個人喺19年尾親自到咗卡加里同滿地可考察嘅時候，就同呢幾個啱啱識嘅朋友見見面、問問生活上嘅困難。因為我哋都明白，每個地方都一定有好嘅一面同唔好嘅一面，就好似身邊總有支持你嘅人但同時亦有傷害你嘅人一樣。而好嘅一面自然心中有數，但生活上可能出現嘅黑暗面，你冇經歷過又點會知道？正如有人會質疑點解加拿大納咁多稅？點解出糧要扣起一大部份？其實，呢邊啲稅係用返落民生津貼同補助，就正正係用返市民身上。至少唔會用來起市民不用嘅鐵路同掉落海啦。
經過我哋嘅兩地考察，正當相討下一步嘅部署，小朋友越洋打畀我哋，喊住話好驚好驚。因為小朋友喺屋企聽到好多槍聲同嗆喉嘅煙霧，仲見到煙霧下嘅街上面有一群帶頭盔嘅人追打市民，見到有啲小朋友畀嗰啲頭盔人圍住打到頭破血流。太太聽到都好擔心，仲喊咗出嚟。於是，我哋就即刻計劃移居卡加里嘅時間表。
返到屋企後，我哋即刻安排考英文試、太太報讀學校、申請簽証、揀住區、租屋⋯⋯最後2021年頭到埗卡加里，開始我哋嘅「第二家園計劃」。
的確，到咗卡加里一段時間就已經覺得，我哋喺2021年離開小島，應該真㨂錯時間。睇到喺卡加里嘅生活同小島嘅變化，我哋錯在應該早點啲瞓醒，喺2014年落大雨嘅時候就應該開遮離開。
又有朋友問我：「喺卡加里生活，你覺得自在嗎？」
我二話不說：「有啲唔自在！」
我唔自在在於，我哋不斷嘗試投入本土生活、學習本土文化。但眼見嘅，都係令人尷尬又熟識嘅畫面⋯⋯
還記得以前小島，有啲人同地產經紀聯繫，隔山買牛式買小島嘅屋，佢哋為求買到間屋，一加就加夠一般島民年薪嘅數去搶屋、喺公眾地方大聲講島民唔識嘅方言、喺街上糊亂橫衝直撞、盲搶貨架上貨品⋯⋯真係估唔到會喺加卡里見到呢啲畫面，而且呢啲人仲係字正腔圓嘅講緊同我哋一樣嘅話。講真，有啲覺得尷尬 ，尷尬得想快啲閃開。
活得自在，都需要避免令其他人唔自在啦，係嘛？
朋友再問我：「你就咁走咗，你覺得自私嗎？」
我二話不說：「自私！」
我哋都覺得，我哋呢班喺呢個時候走嘅小島人都係踩著鮮血而行嘅，我哋從不覺得走得到又有幾咁光彩，但我哋就只有一個小小心願：想後人有一個真正小島嘅回憶同歷史。我好自私，我諗我係好尊重喺整個小島變化中付出過嘅人，但大家應該知道，生活也好生存也好，都要向住未來而努力，唔應該永遠企喺射燈下等人幫助，反而更加要為身處嘅社會作出同樣無私嘅供獻。
我好自私，我覺得有人打正旗號幫同路人，但又要從中得（大）利？聽聞有「幫同路人」嘅地產經紀，開高十萬八萬入標，中標機會固然高，賣家多收咗錢，畀佣金亦當然畀得過癮。我諗大家大概知道，十萬八萬對部份島民嚟講真係雞毛蒜皮嘅事，但對本地基層市民嚟講，已經係兩三年人工。
有人問：「你哋走又走咗，你覺得可以為小島做啲乜？」
我二話不說：「做條毛咩！冇！」
我可以講，小島或者已經無可救藥，但可以做嘅就係為小島人建立形象。
聽過有人話要嗌吓口號先係小島人、救得返小島、又要圍爐生活圈生意不外流云云。但我認為，可以的話凝聚全部小島人，理得係紅黃藍白黑，只要團結得到，聲音自然大。況且一言堂，唔接受異己言論，本身已經唔係大家所認同嘅一套，究竟我哋係幫助同路定係統一一個極權思考模式？
我哋應該要喺本土生活圈入面建立良好形象，多參與多建設社區，令本土人都知道小島人嘅獨持性，希望當有一日真係要發聲時，多啲本土人支持。
如果睇唔到正體中文字嘅力量，可以用放大鏡、望遠鏡擴闊視野睇清楚啲，中文字都可打國際線，咪就係咁簡單囉。
我諗，大家出走動機同原因都差唔到幾多；適應新生活嘅困難同挫折亦都略有相同。但移民要移心，認真投入本地生活先係新生活嘅開始。過去嘅事唔應該忘記；而家就先要忘記過去嘅光環，努力貼地生活；將來嘅嘢⋯⋯其實就基建於而家過嘅每一日。大家加油啦，為建立香港人嘅靚朶努力喇！
「移民故事」純為投稿者真實個案同個人感興分享，與本會館及讀者立場無關。
