沒有項目！
2020 年底，望住電視新聞，我講左一句三十幾年人生都無諗過會講既說話：「老婆，不如我地走啦...」
移民，從來都唔係一個計劃過既路向或選擇，而且憑咩呀?彼此都係草根出生，全靠家人用汗水養大我地，無理財觀念，無投資無炒樓，係有一份熱愛既工作，收入係穩定而又算唔錯，足夠生活有突，18,19 年間，剛好借夠錢有首期可以結婚買樓生兒育女，建立了大家覺得穩定幸福既家庭生活。由於自細已經覺得唔會離開香港，英文從來無認真努力過，旅行亦只衝出過亞洲一次，對呢個世界唔多認識，更唔需要講有任何親朋戚友可以求助。離開香港後，無左穩定收入，無任何技能，本行係外國係無可能繼續，仲有個唔到兩歲既小朋友。移民? 憑咩呀?
有得揀，邊個會想走?望住香港既巨變同發展，再望望自己既小朋友，呢個唔係一個決擇，係一個任務。慶幸係家人雖然都有猶疑過，但最後都明白亦認同，試問，大家一條心下，又有咩係剋服唔到?然後我地過住日頭返工，夜晚搜集資料，慶幸我地唔係有錢人，所以選擇左 DIY，亦非常感謝 Peterson, Rickysan, Ethanson 同其他谷友既資訊，我地先可以完成到我地既移民計劃，21 年 2 月救生艇出台，等於幫我地既計劃買左個保險，5 月時，離開香港既所有野都準備好哂，8 月正式離開香港，估唔到，由決定走，到 8 月正式走，只係用左 8 個多月既時間，真係要再次感謝 Peterson, Rickysan等等既幫助! 接住 3 個月，每日午餐晚餐都係同朋友家人飯聚，真係好唔舒得呢度一切既野，仲好記得，去機場既路上，叫小朋友認住呢個地方，曾經既樂土，有得揀，邊個想放棄自己辛苦建立既成就事業，去一個完全未去過，唔認識，無親戚朋友既地方，連自己都唔知養唔養得起自己，更何況要照顧辛苦養大我地既四大長老?唔係為左下一代，為左為人最基本既自由，邊個會想走?
插曲:朋友同事問我去邊，我同佢地講，我去卡加里。佢地基本上只有兩個反應，一個係唔知卡加里係邊度，只係恭喜我同佩服我會走，其實我心諗，你要走都走到架，只要你捨得，同埋肯付出肯取捨就得。另一個反應係，『下?好凍架喎』，不過根據我搵既資料，我覺得還好啦，至少呢個年代，週圍都暖氣，而且有車出入，加上全球暖化，我去個『咁凍』既地方，唔需要係香港一年四季都變左夏天咁，長遠黎講，氣溫會愈黎愈舒適。
到左卡加里，一個我係 21 年以前完全未聽過既地方，但因為佢既位置可以好容易去到唔同既國家公園，就近洛基山脈，對於我地鍾意大自然既人黎講，係好適合我地既地方!雖然我地放棄左香港既收入同穩定，但我地其實都計過數，呢度搵到全職最低工資，慳住用，雖然儲唔到錢，但足夠生活，唔似香港，人工唔夠高，都真係生活唔到。不過卡加里就近水樓台，鍾意開車出城去幾日，等於去個旅行，飛機錢都慳唔少。香港要搵幾多錢搵幾耐先可以住到獨立屋?但呢度就真係可以住到!係香港咁努力，都係想住大 d，最好有間專睇電影既房，同埋做到自己想做既野，例如親近大自然，黎到卡加里，我既人生目標提早超額完成左!
當然，唔可以否定移民唔係容易，當中好多有驚無險既經歷，亦好彩有好多香港人既幫助，我先可以係度打呢一篇野。係香港，大家都慣左自食其力，但黎到呢邊，先體會到咩叫出外靠朋友，亦好好彩係谷裡面識左唔少好人，得到佢地既幫助。唔計未有車時，車我地認識卡加里，買生活必需品等等，甚至一 d 細微既生活問題，都會好有耐性幫忙解決。而且呢度生活唔同香港，的確好多事要靠自己或靠朋友解決，亦係咁，呢度真係充滿左人情味。移民的確唔容易，不過只要你肯行出呢步，你並唔孤單!
加拿大係一個移民國家，所以呢度既包容性係好高，黎到呢邊，原本好擔心英文，雖然都係要努力去改善，但其實只係自己想做好 d，呢度既人係唔會介意你英文水平。過到黎呢邊，我先知道咩叫做生活!好多『朋友』好『關心』我，適唔適應呢邊既生活，我只想講，如果要我返香港，我怕我會唔適應香港多 d...更何況，已經返唔到去以前既香港。
21 年 8 月第一次踏足加拿大，有好多野要安頓未識反應。
21 年 12 月聖誕節，我眼淚湧出黎講「老婆，我地走左喇!」我地望住已經兩歲幾既小朋友係呢度既成長，好開心我地行出左個一步!好多謝當中幫左我地無數大大小小忙既香港人，我亦都希望將呢個精神延續，互相幫助團結! 香港人加油!
卡加里嘅其中一個家庭