沒有項目！
 |  |
我係香港土生土長既80後，有3個小朋友。 2019年開始經歷咗不一樣既香港，下定決心要離開，可惜一直無從入手。 直到2021年，老公合資格申請owp。 經歷咗情緒起起伏伏、幻得幻失又精神分裂既8個星期，owp終於approved，我地一家五口係上年7月離開生活咗差不多40年既香港。 眨下眼，黎咗加拿大就快一年，都適應得7788。Calgary"最得人驚"應該係天氣，d朋友聽到Calgary都會話：「吓？冬天負廿幾三十度，你唔驚咩？」其實都驚驚地，但因為有親戚住Calgary，之前趁冬天黎「體驗」過，又覺得唔係咁恐怖啫。 由於我十月已經考到車牌，小朋友返學放學都係車出車入，問題不大。比較辛苦係老公朝早要幫架車掃雪 (之前住townhouse車泊outdoor)，又或者係去完超市落緊雪嗰時要放d grocery入車尾箱，試過眼睫毛結霜。基本上一入室內或一上車已經暖返晒，個人覺得比香港既冬天舒適，而神奇地哮喘等氣管、鼻敏感問題好似都消失咗。
黎到加拿大，學習放慢腳步，每段時間只專注做一件事，得閒抬頭欣賞下如畫既風景，比起以前係香港好急好燥底既性格，個人愈來愈chill，愈來愈明白勉強無幸福既道理。回望一下，與其留係一個連呼吸都有壓力既地方，倒不如放手一試，離開自己既comfort zone，又另有一番新景象。以香港人能屈能伸既特質，我相信無論我地身處邊一個地方，都可以做好一個「香港人」。 最後，衷心感謝每一位幫助過我們這一家既同鄉，小女子希望可以將里份無私互助既精神承傳落去，HKer，加油~!
| |
| ** 歡迎大家Click 下面個 Facebook 俾個 Like 同埋 Share 去 Support 番響卡加里住嘅香港人 FB Blogger ** | |
