2022-08-21
話咁快嚟咗Calgary就快半年喇，仲好記得2019年開始計劃嚟加拿大定居，嗰年年尾決定嚟加拿大睇下先，經朋友介紹入咗個加拿大香港人group, 當時冇依家咁多資料，而我同先生兩人都未嚟過加拿大。嚟到calgary第二日谷主仲請我哋飲茶同埋講咗好多呢度嘅嘢畀我哋知，仲帶我哋去新區話畀我哋知有show home可以參觀，返香港後一直都得到好多谷友嘅幫助，尤其係申請spouse sponsorship 期間有唔同嘅問題。
嚟到住落一排，呢度俾我想像中更適合自己。香港人會覺得加拿大人做嘢比較慢效率低，其實退一步諗，係香港呢個咁高壓嘅地方先要求員工一打十，同事離職你應份要做埋佢個份? 不過呢度講合理性，人多就要等，等係好合理。急燥冇耐性嘅香港人會好唔習慣，但反思翻其實香港呢個地方好扭曲，我哋被要求要出人頭地，要搵有錢途嘅工，面對西客都要服務至上，要升職加人工先可以買樓擁有自己嘅家。做咩職業邊會講自己嘅興趣？連父母都只會話做邊行先搵到錢。而Calgary大部份工作都差唔多人工，兩公婆每人真係求其搵份min pay工都供得起樓。有人話加拿大好悶，冬天長時間要留室內，所以終於有時間拎起本書，拎起枝畫筆。喺香港窮得只有錢，嚟到認真反思咩係生活。
喺加拿大，就算移民潮再大，香港人都仍係少數族群，有幸認識到一班合得嚟嘅朋友，亦有餘力可以幫助一啲新嚟嘅朋友。
希望香港人會更團結，互助互愛。
「移民故事」純為投稿者真實個案同個人感興分享，與本會館及讀者立場無關。
